Sabo 13 xugno,
giorno de S. Antonio, xe mancà a Porto Alegre nel Rio Grande do
Sul, Brasile, Padre Rovilio Costa de 74 ani Frate capuccino,
laureà in Filosofia e Pedagogia, storico de la cultura taliana
del Sud del Brasile, el ga publicà pì de 20 libri e, come
editore con la EST el gà publicà pì de 2.000
libri. Patrono de la "51 Fiera del livro" de Porto Alegre nel 2005, e
proprio in ocasion de sto premio tanto inportante, xe sta mese insieme
diverse testimonianze so Rovilio, anca la mia, e par mi xe sta on onor
grando, scrivare ste poche righe :
"A
go conossù Rovilio Costa do volte: la prima, lezendo i so libri
che i me jera sta regalà da Paulo Massolini quando che so
vegnù nel Rio Grande do Sul par la prima volta nel 1994.
Libri come
“Assim vivem os italianos” e “Far la Merica”
che i me ga fato conossare la cultura “taliana” e on
patrimonio straordinario de lengua, de tradizion, de civiltà,
che i me ga fato conossare on altro Veneto de la dal mar, de la de
l’Oceano.
La seconda, quando
che go vu la fortuna de conosserlo de persona, a casa sua. E Rovilio,
par capir ben la so dimension, el so spessor, la so cultura e la so
modestia, tute e do smisurà, bisogna andar a catarlo in mezo ai
so libri.
E quanto che te resta drento dopo che Te lo ghe scoltà par on poco…..
Tra pile di libri
che Dio solo sa come che i fa a non cascar, tra on poca de polvere che
no la da fastidio ma che la ze la a testimoniar noti e noti a studiar,
a ricercar, a scrivere, tra el profumo de stanpa e inchiostro vien fora
la grandezza de sto omo dai oci grandi e da la vose calma, profonda e
che te ciapa.
Na vose pronta a
diventar on torente in piena quando che se trata de difender el
“talian” magari di fronte a qualche profesoron che riva da
l’Italia e che voria pretender de insegnar solo
“l’italiano grammaticale”, zente che dimostra de non
aver capio gniente de quanto grando ze sta el laoro fato par difender e
tramandar on patrimonio che ben altra considerazion el meritaria e, non
solo in Brasile ma specialmente nel Veneto e in Italia.
E pensar che le
nostre università (mejo le università italiane) le ghe da
le lauree “honoris causa” a cantanti, motociclisti e vanti
cussì, e na figura come Rovilio, on munumento vivente de la
cultura “taliana” come Rovilio Costa vien ignorà.
Cosa zela, invidia,
ignoransa o Rovilio l’è on omo ( mejo on Omo con la O
maiuscola) masa libero e lora lasemolo là a Porto Alegro che se
lo fasemo vegner in Italia el podaria scominziar a far dani anca
qua…..El podaria aiutar tanta zente a svejarse fora…..
Grasie, Rovilio par
tuto quelo che Te ghe fato par i taliani del Brasile e par i veneti che
ze restà nel Veneto e che el Signor el Te daga tanta salute par
continuar a restar el “monumento vivente”, el faro de la
cultura taliana nel Brasile e nel mondo."
ETTORE BEGGIATO
Cittadino onorario de Serafina Correa
On strucon, Rovilio, e grasie de tuto.
